பொருத்து வீடுகள் மூலமான இன அழிப்புக்கு தமிழ்த் தலைமையும் உடந்தையா?

0

யார் எதிர்த்தாலும் பொருத்து வீடுகளை அமைத்தே தீருவோன் என்று அமைச்சர் சுவாமிநாதன் அடம்பிடித்து நிற்கிறார். 2016 இல் மைத்திரி நல்ல அரசியல் காரியங்களை செய்திருப்பதாக சம்பந்தர் கூறுகிறார். பொருத்து வீடுகள் எமது சமூகத்திற்கு பொருந்ததாக வீடுகள் என்று வடக்கு முதலமைச்சர் விக்கினேஸ்வரன் தெரிவித்துள்ளார். பொருத்து வீடுகளை வழங்குவதையுமா மைத்திரி செய்த நல்ல காரியங்கள் பட்டியலில் சம்பந்தர் சேர்க்கிறார்?

பொருத்து வீடு வடக்கிற்கு மாத்திரமல்ல, மலையகத்திற்கு மாத்திரமல்ல, நாட்டுக்கே பொருந்தாது என்று அமைச்சர் மனோகணேசன் கூறியிருக்கிறார். அரசில் அங்கம் வகிக்கும் ஒரு அமைச்சர் இவ்வாறு சொல்லியும்கூட அமைச்சர் சுவாமிநாதன் பொருத்து வீடு அமைப்பதற்கு விடாப்பிடியாய் இருப்பது ஏன்? வடக்கு கிழக்கில் தமிழ் மக்கள் தானே வாழ்கிறார்கள். அவர்களுக்கு எந்த வீட்டை கொடுத்தால் என்ன மனநிலையின் வெளிப்பாடா இது?

உண்மையில் பொருத்து வீடுகள் இலங்கைத் தீவில் வடக்கில் பொருத்தி பரிசோதனை மேற்கொள்ளப்படுகிறது என்றே பொறியியல் துறை சார்ந்த நிபுணர்கள் எச்சரித்துள்ளனர். பொருத்து வீடுகள் வேண்டாம் என்று கூறி மக்கள் ஆர்ப்பாட்டங்களை நடத்திய பின்னரும் சிங்கள அரசு திணிப்பதில் உள்ள மர்மம் என்ன? அந்த வீடுகளின் பாகங்கள் மக்களை பொருளாதார நெருக்கடியில் தள்ளுவதுடன் அந்த வீட்டில் வசிப்பவர்களுக்கு உடலில் பாதகங்களை ஏற்படுத்தும் என்றும் எச்சரிக்கப்பட்டுள்ளது. முழுக்க முழுக்க இரும்பால் ஆன குறித்த வீடுகள் வாழ்வுக்கு பொருந்தாதவை.

தகரங்களால் ஆன கூரையினாலும் பெரும் பாதிப்புக்கள் உண்டனெ கூறப்படுகின்றது. உண்மையில் இன அழிப்பின் மற்றுமொரு செயற்பாடாகவே பொருத்து வீடு கருதப்படுகின்றது. அதில் வாழும் மக்கள் பல்வேறு நோய்களினால் பாதிக்கப்பட்டு அழியும் என்றே ஸ்ரீலங்கா அரசு திட்டமிடுகிறது. ஒன்று அந்த வீட்டில் வசிப்பதன் மூலம் புற்றுநோய் போன்ற கடுமையான நோய்கள் ஏற்படலாம் என்று எச்சரிக்கை விடுக்கப்பட்டுள்ளது.

அடுத்து அந்த வீட்டில், விறகு அடுப்பில்லை. காஸ் அடுப்பே தேவை. ஏசி தேவை. மின்சிவிறி அவசியம். மலசல அறைகள் பழுது பட்டால் பெரும் செலவில் திருத்தம் செய்ய வேண்டும். இந்த வீட்டில் வாழும்போது பெரும் செலவுகள் பெரும் தேவைகள் ஏற்படும். போரால் பாதிக்கப்பட்ட எங்கள் மக்களுக்கு இதற்கு எல்லாம் செலவு செய்ய பணம் உண்டா? இதனால் அவர்கள் பல்வேறு உள, பொருளாதார பாதிப்புக்களுக்கு முகம் கொடுப்பார்கள்.

இந்த வீட்டு தளபாடப் பொருட்களுக்காக பல்வேறு கம்பனிகள் இணைந்துள்ளன. இதில் அவர்களுக்கு விளம்பரம் செய்யப்படுவதுடன் இந்த கம்பனிகளை நம்பி வாழ வேண்டிய நிலைக்கு மக்கள் தள்ளப்படுவார்கள். இந்தக் கம்பனிகளின் ஆதிக்கத்தால் பெரும் பொருளாதார நெருக்கடி மக்களுக்கு ஏற்படும். இத்தகைய நெருக்கடிகள் எல்லாம் ஏற்பட்டு மக்கள் அழிய வேண்டும் என்பதைதான் சிங்கள அரசு விரும்புகிறதா?

பொருத்து வீடுகள் விவாகரத்தில் சிங்கள அரசின் எதேச்சிகார நடவடிக்கை மைத்திரி அரசிற்கும் மகிந்த அரசுக்கும் எந்த வித்தியாசமும் இல்லை என்பதை தெளிவாக எடுத்துரைக்கிறது. வடக்கு கிழக்கு மக்களின் பிரதிநிதிகளின் கோரிக்கையை துளியளவும் கணக்கில் எடுக்காமல் இத் திட்டத்தை நடைமுறைப்படுத்துவதன் மூலம், தமிழ் மக்களின் பிரதிநிதிகளுக்கு எந்த அதிகாரமும் உரிமையும் இல்லை என்றும் உணர்த்துகிறது.

சிங்கள அரசு நினைத்தால் தமிழ் மக்களின் தலையில் கொத்துக் குண்டையும் போடும் பொருத்து வீட்டையும் போடும் என்பதே காலம் முழுவதும் நடந்து வருகிறது. இந்த நிலையில் இதை எல்லாம் சகித்துக் கொண்டிருக்கும் மக்கள் தலைவர்களின் நிலமையைப் பார்க்கும்போதுதான் சினம் அதிகமாகிறது. இதனை உடனடியாகத் தடுக்காது விட்டால் பொருத்து வீடுகளின் மூலம் முன்னெடுக்கப்படும் இன அழிப்புக்கு தமிழ்த் தலைமையும் உடந்தை செய்தது என்ற வரலாற்றுப் பழி நிச்சயம் சூழும்.

தமிழவன்,
செண்பகம்.
07.01.2017

இன அழிப்புசுவாமிநாதன்பொருந்தா வீடுவீட்டுத் திட்டம்