வனவளத் திணைக்களத்தின் காணிபறிக்கும் படலம் முல்லைத்தீவில் தொடர்த வண்ணமே உள்ளதாக தெரிவிக்கப்பட்டுள்ளது.
முல்லைத்தீவு, செம்மலை புளியமுனைப் பகுதியில் உள்ள மக்களது தோட்டக் காணிகளே இவ்வாறு அபரிக்கப்பட்டுள்ளதாகவும் குறிப்பிடப்பட்டுள்ளது.
தற்போதும் 100 ஏக்கர் தமிழர் காணிகளை வனவளதிணைகளம் அபகரித்து எல்லையிடப்பட்டுள்ளதனால், 40 குடும்பங்களின் வாழ்வாதாரம் முடக்கப்பட்டுள்ளதாகவும் கூறப்படுகின்றது .
முல்லைத்தீவு மாவட்டத்தின் நாயாறு கொக்குத்தொடுவாய் முதன்மை வீதியின் மேற்குப் புறமாக உள்ள புளியமுனைப் பகுதியில் உள்ள சுமார் 720 ஏக்கர் காணிகள் 1972 ஆம் ஆண்டுகளில் செம்மலையில் உள்ள 350 மக்களுக்குப் பயிர்ச் செய்கைக்கென அரசாங்கத்தினால் வழங்கப்பட்டிருந்தது.
குறித்த காணிகளில் மக்கள் வயல் மற்றும், கச்சான், சோளம் போன்ற உப உணவுப் பயிர்ச் செய்கையிலும் ஈடுபட்ட நிலையில்,போர் இடம்பெற்ற காலத்தில அங்கு பயிர் செய்ய முடியாமல் அந்தக் காணிகள் கைவிடப்பட்டிருந்தன.
போரின் பின்னர் கடந்த மூன்று ஆண்டுகளாக காணிகளின் ஒரு பகுதியை துப்புரவு செய்த மக்கள் மீண்டும் விவசாயத்தினை மேற்கொண்டபோது கடந்த வாரம் அங்கு சென்ற வனஇலாகாத் திணைக்களத்தினர் அந்தக் காணிகள் வனவளத்துக்குச் சொந்தமானவை என்று தெரிவித்து காணிகளை அடையாளபப்படுத்தி பெயர்ப் பலகை நட்டுள்ளனர்.
காணிகளுக்குள் அத்துமீறுவோருக்கு எதிராக சட்ட நடவடிக்கை எடுக்கப்படும் என்றும் மக்களை அச்சுறுத்தியுள்ளனர்.
இதனால் அந்தக் காணிகளுக்குச் சென்று பயிர்ச் செய்கையில் ஈடுபடமுடியாதுள்ளது என்றும் காணிகளை மீட்டுத் தருமாறும் பாதிக்கப்பட்ட மக்கள் பலரிடமும் கோரிக்கை விடுத்துள்ளதாக குறித்த பகுதி மக்கள் தெரிவித்துள்ளமை குறிப்பிடத்தக்கது.