மலைநாட்டு புதிய கிராமங்கள், உட்கட்டமைப்பு மற்றும் சமூக அபிவிருத்தி அமைச்சில் நேற்று வெள்ளிக்கிழமை நடைபெற்ற நிகழ்வில் இவ்வொப்பந்தம் கைச்சாத்திடப்பட்டது. மலைநாட்டு புதிய கிராமங்கள், உட்கட்டமைப்பு மற்றும் சமூக அபிவிருத்தி அமைச்சர் பழனி திகாம்பரம் மற்றும் இலங்கைக்கான இந்திய தூதுவர் வை.கே.சின்ஹா ஆகியோர் மேற்குறித்த ஒப்பந்தத்தில் கைச்சாத்திட்டனர்.
இந்திய அரசாங்கத்தின் நிதி உதவியுடன் அமைக்கப்படவுள்ள மேற்குறித்த 4 ஆயிரம் வீடுகளும் மத்திய மற்றும் ஊவா மாகாணங்களில் 2020 ஆம் ஆண்டுக்கு முன் முழுமையாக நிர்மாணிப்பதற்கு உத்தேசிக்கப்பட்டுள்ளது.
இந்நிகழ்வில் தமிழ் முற்போக்கு கூட்டணியின் தலைவரும் அமைச்சருமான மனோ கணேசன், கல்வி இராஜாங்க அமைச்சர் வே.இராதாகிருஷ்ணன், பாராளுமன்ற உறுப்பினர் வடிவேல் சுரேஷ், அமைச்சின் செயலாளர் ரஞ்சனி நடராஜபிள்ளை, மத்திய மாகாண சபை உறுப்பினர் மா.உதயகுமார், முன்னாள் எம்.பி.புத்திரசிகாமணி உட்பட முக்கியஸ்தர்கள் பலர் கலந்துகொண்டிருந் தனர்.
இங்கு அமைச்சர் திகாம்பரம் உரையாற்றுகையில், மலையகத்தில் புதிய வீடுகளை அமைக்கும் பணிகள் ஆரம்பிக்கப்பட்டுள்ள நிலையில் 4 ஆயிரம் புதிய வீடுகளை இந்தியா அமைத்துத்தரவுள்ளது. மலையக மக்களின் லயன் வாழ்க்கைக்கு முற்றுப்புள்ளி வைப்பதற்காக தற்போது முதற்கட்டமாக மலையகத்தின் பொகவந்தலாவை மற்றும் அக்கரபத்தனை ஆகிய பகுதிகளில் வீடுகளை நிர்மாணிக்கும் பணிகள் ஆரம்பிக்கப்பட்டுள்ளன. 7 பேர்ச்சஸ் காணியில் தனி வீடு அமைக் கும் இந்த திட்டம் மலையகத்தின் ஏனைய பகுதிகளிலும் வெகு விரையில் முன்னெடுக்கப்படும்.
இந்திய அரசாங்கத்தினால் இந்த வீடுகள் இலவசமாக அமைத்துக் கொடுக்கப்படவுள்ளன. மலையக தலைவர்களுடன் இந்திய அரசாங்கம் ஒப்பந்தம் செய்துகொள்ளும் முதல் சந்தர்ப்பமாகவும் இது பதிவாகின்றது என்று குறிப்பிட்டார்.
அமைச்சர் மனோ கணேசன் கருத்துத் தெரிவிக்கையில், மலையக மக்கள் வீடற்றவர்கள் என்ற அவப்பெயரை நீக்கும் நோக்கில் இந்த திட்டம் ஆரம்பிக்கப்பட்டுள்ளது. இந்திய பிரதமர் நரேந்திர மோடி, இந்திய வெளிவிவகார அமைச்சர் சுஷ்மா சுவராஜ் ஆகியோரின் வருகையின் பலனாக இந்த திட்டம் மலையக மக்களுக்கு கிடைத்துள்ளது. எதிர்வரும் 24 ஆம் திகதி இந்த திட்டம் ஆரம்பிக்கப்படவுள்ள நிலையில் மலைய மக்களையும் ஏனைய சமூகங்களுக்கு நிகராக உயர்த்த எதிர்பார்த்துள்ளோம்.
இந்நிலையில் தற்போது நாடளாவிய ரீதியில் நிர்மாணிக்கப்படும் 50 ஆயிரம் வீடுகளில் 4 ஆயிரம் வீடுகள் மலையக மக்களுக்கு அமைத்துக் கொடுக்கப்படவுள்ளது. எதிர்காலத்தில் மேலும் புதிய வீடுகளை மலையகத்தில் நிர்மணித்துக்கொடுக்க எதிர்பார்த்துள்ளோம்.
மலையக மக்களின் தொகையினை கருத்திற்கொள்ளும் போது மேலும் 20 ஆயிரம் புதிய வீடுகள் தேவையாக உள்ளது. இந்த கோரிக்கையினை இந்திய பிரதமர் நரேந்திர மோடியிடத்தில் பகிரங்கமாக முன்வைத்துள்ளோம். எனவே இந்திய அரசாங்கம் மலையக மக்கள் தொடர்பில் அவதானம் செலுத்தி எமது கோரிக்கைக்கு அமைவாக மேலும் புதிய வீடுகளை நிர்மாணிப்பதற்கான உதவிகளை வழங்குமென எதிர்பார்த்துள்ளோம் என்றார்.
இலங்கைக்கான இந்திய தூதுவர் வை.கே.சின்ஹா கருத்துத் தெரிவிக்கையில்,
இலங்கைக்கு இந்திய அரசாங்கம் வழங்கும் உதவித் திட்டங்களில் வீட்டுத் திட்டமும் ஒன்றாகும். வடக்கு, கிழக்கில் 45 ஆயிரம் வீடுகளை அமைக்கும் பணி ஆரம்பிக்கப்பட்டுள்ளது. தற்போது மலையகத்தின் வீடமைப்புத் திட்டமும் ஆரம்பிக்கப்படவுள்ளது. அதேபோல் தோட்டத் தொழிலாளர்கள் வாழும் பகுதிகளை மேம் படுத்த பல உதவித் திட்டங்களை இலங் கைக்கு வழங்கவுள்ளோம். அதன் படி மாத்தளையில் மகாத்மா காந்தி மண்டபம் அமைக்கப்பட்டுள்ளது.
கண்டி தலதா மளிகை, புஸல்லாவ சரஸ்வதி வித்தியாலயம் ஆகிய இடங்களில் வீடமைப்பு, தொழில்நுட்ப மற்றும் தொழில்நுட்ப மத்தியஸ்தானங்கள் அமைக்கப்படவுள்ளன. இந்திய – இலங்கை உறவை வலுப்படுத்தவும் முன்னெடுக்கவும் இவை உதவும். இந்தத் திட்டங்களுக்கு ஒத்து ழைப்பு வழங்கிய இலங்கை அரசாங்கத் திற்கும் நன்றி தெரிவிக்கிறேன் என்றார்.