முதலாவது சர்வதேச பிரிமியர் டென்னிஸ் லீக் போட்டியின் முதல் இரண்டு சுற்று ஆட்டங்கள் முறையே மணிலா மற்றும் சிங்கப்பூரில் நடந்தது. இந்த போட்டியில் இந்தியன் ஏசஸ், ஐக்கிய அரபு எமிரேட்ஸ் ராயல்ஸ், மணிலா மாவ்ரிக்ஸ், சிங்கப்பூர் சிலாமர்ஸ் ஆகிய 4 அணிகள் கலந்து கொண்டு மோதி வருகின்றன. இந்த போட்டிக்கான அணிகளில் உலகின் முதல் நிலை வீரர் நோவாக் ஜோகோவிச் (செர்பியா), ரோஜர் பெடரர் (சுவிட்சர்லாந்து), பீட் சாம்பிராஸ் (அமெரிக்கா) உள்பட முன்னணி வீரர்-வீராங்கனைகள் மற்றும் முன்னாள் ஜாம்பவான்கள் பங்கேற்று உள்ளனர்.
2-வது சுற்று முடிவில் இந்தியன் ஏசஸ் 6 ஆட்டங்களில் விளையாடி 4 வெற்றி, 2 தோல்வியுடன் 20 புள்ளிகள் பெற்று முதலிடத்தில் உள்ளது. ஐக்கிய அரபு எமிரேட்ஸ் ராயல்ஸ் அணி 6 ஆட்டத்தில் ஆடி 3 வெற்றி, 3 தோல்வியுடன் 17 புள்ளிகளுடன் 2-வது இடத்திலும், மணிலா மாவ்ரிக்ஸ் 3 வெற்றி, 3 தோல்வியுடன் 17 புள்ளிகள் பெற்று 3-வது இடத்தில் இருக்கிறது. ‘இந்த போட்டிக்கு அமோக வரவேற்பு இருப்பதாகவும், அடுத்த ஆண்டு முதல் மேலும் 2 அணிகள் சேர்க்கப்படும்’ என்று போட்டி அமைப்பாளர் மகேஷ்பூபதி தெரிவித்துள்ளார்.
இந்த நிலையில் இந்த போட்டியின் 3-வது சுற்று ஆட்டம் டெல்லியில் இன்று (சனிக்கிழமை) முதல் 8-ந் தேதி வரை நடக்கிறது. இன்று நடைபெறும் ஆட்டங்களில் ஐக்கிய அரபு எமிரேட்ஸ் ராயல்ஸ்-சிங்கப்பூர் சிலாமர்ஸ் அணியும், இந்தியன் ஏசஸ்-மணிலா மாவ்ரிக்ஸ் அணியும் மோதுகின்றன.