யாழ்ப்பாணம் மணிக்கூட்டு கோபுர சுற்றவட்டத்தில் ஓட்டுக்குழுத் தலைவனும் தமிழினத் துரோகியுமான டக்ளஸ் தேவானந்தாவினால் திறந்துவைக்கப்பட்ட வீரத் தமிழ் மன்னர்களின் சிலைகள் குறித்து தமிழ் மக்களிடையே கடும் சந்தேகம் வெளியிடப்பட்டுள்ளது. தமிழ் மன்னர்களின் வீரத்தை மழுங்கடிக்கும் வகையில் இந்தச் சிலைகள் அமைக்கப்பட்டுள்ளதாக மக்கள் குற்றஞ்சாட்டியுள்ளனர்.
குறித்த சிலைகளில் வீரத்திற்குரிய முகபாவம் இல்லை. ஏதோ அவர்கள் குதிரைகளிலும் யானையிலும் அமர்ந்திருப்பது போன்று சித்தரிக்கப்பட்டுள்ளது. மாறாக அவர்களின் முகத்திலோ உடலிலோ எத்தகைய வீரத்தையும் காணவில்லை. மன்னர்கள் போன்று அவர்களின் உடற்கட்டமைப்பு அமைக்கப்படவில்லை. தமிழ் மக்களுக்காக நீண்ட காலம் போராடிய மன்னர்களின் வீரத்தை அவமதிப்பதற்காக சிறிலங்கா ஆளும் வர்க்கத்துடன் இணைந்தே இந்தச் சிலைகள் வடிவமைக்கப்பட்டுள்ளதாக மக்கள் குற்றம்சாட்டியுள்ளனர்.
இதைவிட இங்கு அமைக்கப்பட்ட எல்லாளன் என்ற தமிழ் மன்னனின் பெயர் முற்றிலும் பிழையாக எழுதப்பட்டுள்ளது. எல்லாளன் என்பதற்கு பதிலான எள்ளாளன் என்று எழுதப்பட்டுள்ளது. இந்த தமிழ் உயிர்க்கொலை தொடர்பாகவும் மக்கள் கடும் விசனம் வெளியிட்டுள்ளனர்.
அனுராதபுரத்தை 44 ஆண்டுகள் நீதிநெறி வழுவாது அரசாண்ட மாவீரன் எல்லாளனை துட்டச்சதியினால் வென்ற துட்டகாமினி மன்னன் 24 ஆண்டுகள் அரசாண்டான். வரலாற்றை எழுதிய மகாவம்சம் குறுகியகாலம் ஆண்ட துட்டகாமினியை 845 செய்யுட்களிலும் நீண்ட காலம் நீதி தவறாது ஆண்ட எல்லாளனை வெறுமனே 21 செய்யுட்களில் மட்டுமே பாடியது. சிங்கள இலக்கியங்களும் வரலாற்று ஏடுகளும் திட்டமிட்டு தமிழ் மன்னர்களின் வரலாற்று இருப்பை மறைத்தழித்தன என்பது குறிப்பிடத்தக்கது.