Designed by Iniyas LTD
அறிவிக்காமல் படை முகாமிற்கு சம்மந்தன் சென்றது தவறாம்!
எதிர்க்கட்சித் தலைவர் சம்பந்தன் படை முகாம்களுக்குச் செல்லலாம். ஆனால் அதற்கான முன்னறிவித்தல் வழங்கப்பட வேண்டும். இது தொடர் பில் அரசாங்கம் அவருக்கு அறிவித்தல் விடுத்துள்ளது என்று அமைச்சர் மஹிந்த சமரசிங்க தெரிவித்தார்.
உடனடியாக வடக்கில் படையினருக்கு ஆயுதங்களை கைவிடுமாறும் பாதுகாப்பை குறைக்குமாறும் அறிவுறுத்தல் வழங்க முடியாது என்றும் அமைச்சர் குறிப்பிட்டார்.
கொழும்பில் அரசாங்க தகவல் திணைக்களத்தில் நேற்று திங்கட்கிழமை இடம்பெற்ற ஊடகவியலாளர் மாநாட்டில் உரையாற்றுகையிலேயே அமைச்சர் மஹிந்த சமரசிங்க இவ்வாறு தெரிவித்தார்.
அமைச்சர் இங்கு தொடர்ந்தும் உரையாற்றுகையில்,
இன்று நாட்டில் யுத்தம் இல்லை சமாதான சூழல் நிலவுகின்றது. எனவே எதிர்க்கட்சித் தலைவர் சம்பந்தனாகட்டும் அல்லது பாராளுமன்றத்திலுள்ள எந்தவொரு மக்கள் பிரதிநிதியாகட்டும் அவர்களுக்கு படை முகாம்களுக்கு செல்ல முடியும். தடையில்லை.
ஆனால் அவ்வாறு செல்வதற்கு முன்பதாக இராணுவத் தளபதி அல்லது தான் செல்லப் போகும் படை முகாமின் உயரதிகாரிகளிடம் விடயத்தை கூறி முன்னேற்பாடுகளுடன் முன்னறிவித்தலுடன் செல்ல வேண்டும்.
அவ்வாறு இல்லாமல் திடீரென முகாமுக்கு எதிர்க்கட்சித் தலைவர் சென்றமை பிழையான செயற்பாடாகும். வடக்கில் புலிகளுடன் 30 வருட காலயுத்தம் நடந்தது. மக்கள் அரச தலைவர்கள் படையினர் என பலர் கொல்லப்பட்டனர்.
இத்தகையதோர் சூழ்நிலையில் யுத்தம் முடிந்து இன்று 7 வருடங்கள் தான் கழிந்துள்ளன. எனவே இன்றும் தேசிய பாதுகாப்பு தொடர்பாக அதிக கவனம் செலுத்தப்பட வேண்டியது அரசின் பொறுப்பாகும்.
இதனால் வடக்கில் இராணுவத்தை உடனடியாக குறைக்கவும் ஆயுதங்களை கைவிடுமாறும் கோற முடியாது. ஏனென்றால் தேசிய பாதுகாப்பு அத்தியாவசியமானதாகும்.
எதிர்க்கட்சித் தலைவர் தனக்குள்ள பொலிஸ் பாதுகாப்புடனேயே படை முகாமுக்கு சென்றுள்ளார். எதிர்க்கட்சித் தலைவர் என தெரிவிக்கப்பட்ட பின்னரே கதவு திறக்கப்பட்டது.
அவரது விஜயத்தில் வெடிப்பொருட்களோ ஆயுதங்களோ இருக்கவில்லை. இவ்வாறான செயற்பாடுகள் இனவாதிகள் அடிப்படைவாதிகளுக்கு குழப்பங்களை ஏற்படுத்த சாதகமாக அமையும்.
எனவே இனி எதிர்காலத்தில் படைமுகாம்களுக்கு எதிர்க்கட்சி தலைவராகட்டும் எந்தவொரு மக்கள் பிரதிநிதியாகட்டும் அவர்கள் படை உயரதிகாரிகளுக்கு அறிவித்து அனுமதி பெற்று முன்னேற்பாடுகளுடன் செல்ல வேண்டுமென்ற அறிவுறுத்தல்களை அரசு விடுத்துள்ளது என தெரிவித்துள்ளார்.