நியூசிலாந்து–இங்கிலாந்து நாளை பலப்பரீட்சை

20 ஓவர் உலக கோப்பை கிரிக்கெட் போட்டியில் ‘சூப்பர் 10’ சுற்று ஆட்டங்கள் நேற்றுடன் முடிந்தன.

இதன் முடிவில் இந்தியா, நியூசிலாந்து, வெஸ்ட் இண்டீஸ், இங்கிலாந்து ஆகிய 4 அணிகள் அரை இறுதிக்கு தகுதி பெற்றன.

ஆஸ்திரேலியா, தென் ஆப்பிரிக்கா, நடப்பு சாம்பியன் இலங்கை, முன்னாள் சாம்பியன் பாகிஸ்தான், வங்காளதேசம், ஆப்கானிஸ்தான் ஆகிய அணிகள் வெளியேற்றப்பட்டன.

இன்று ஓய்வு நாளாகும். முதல் அரை இறுதி ஆட்டம் டெல்லி பெரோசா கோட்லா மைதானத்தில் நாளை (புதன்கிழமை) இரவு 7 மணிக்கு நடக்கிறது. இதில் நியூசிலாந்து– இங்கிலாந்து அணிகள் மோதுகின்றன.

இரு அணிகளும் சமபலம் பொருந்தியவை என்பதால் அரை இறுதி ஆட்டம் மிகவும் விறுவிறுப்பாக இருக்கும் என்று எதிர்பார்க்கப்படுகிறது. இறுதிப் போட்டிக்கு முன்னேற இங்கிலாந்து, நியூசிலாந்து அணிகள் கடுமையாக போராடும்.

வில்லியம்சன் தலைமையிலான நியூசிலாந்து அணி தான் மோதிய 4 ஆட்டங்களிலும் வென்று ‘குரூப் 2’ பிரிவில் முதலிடத்தை பிடித்து அரை இறுதிக்கு தகுதி பெற்றது. தோல்வியை சந்திக்காத அந்த அணி இங்கிலாந்தை வீழ்த்தி முதல் முறையாக இறுதிப்போட்டிக்கு நுழையும் ஆர்வத்துடன் உள்ளது.

2–வது முறையாக அரை இறுதியில் விளையாடும் நியூசிலாந்து அணியில் கேப்டன் வில்லியம்சன், குப்தில், முன்னாள் கேப்டன் ரோஸ் டெய்லர், முன்ரோ, ஆண்டர்சன் போன்ற அதிரடி வீரர்கள் உள்ளன. சுழற்பந்தில் நாதன் மெக்குல்லம், சான்ட்னெர், இந்தர்சிங் சோதி முத்திரை பதிக்க கூடியவர்கள்.

மார்கன் தலைமையிலான இங்கிலாந்து அணி பேட்டிங், பவுலிங்கில் சமபலத்துடன் உள்ளது. தென்ஆப்பிரிக்காவுக்கு எதிராக 230 ரன் இலக்கை எடுத்தது. இலங்கைக்கு எதிராக கடைசி ஓவரில் சிறப்பாக பந்துவீசி முத்திரை பதித்தது. 3 வெற்றி, ஒரு தோல்வியுடன் ‘குரூப் 1’ பிரிவில் 2–வது இடத்தை பிடித்தது.

2010–ம் ஆண்டு சாம்பியனான இங்கிலாந்து அணியில் கேப்டன் மார்கன், பட்லர், ஜோ ரூட், ஹால்ஸ், ஜேசன் ராய், மொய்ன்அலி, பென் ஸ்டோக்ஸ், ஜோர்டன் போன்ற சிறந்த வீரர்கள் உள்ளனர். நியூசிலாந்தை வீழ்த்தி 2–வது முறையாக இறுதிப்போட்டிக்கு நுழையும் ஆர்வத்துடன் அந்த அணி இருக்கிறது.

இரு அணி வீரர்கள் விவரம்:–

நியூசிலாந்து: வில்லியம்சன் (கேப்டன்), குப்தில், முன்ரோ, ரோஸ் டெய்லர், ஆண்டர்சன், ரோஞ்சி, ஆடம் மிலின், போல்ட், நாதன் மெக்குல்லம், சான்ட்னெர், இந்தர்சிங் சோதி, எல்லியர்ட், நிக்கோலஸ், சவுத்தி, மெக்லகன்.

இங்கிலாந்து: மார்கன் (கேப்டன்), ஜேசன் ராய், ஹால்ஸ், ஜோரூட், பட்லர், பென் ஸ்டோக்ஸ், மொய்ன் அலி, ஜோர்டன், டேவிட் வில்லி, ஆதில் ரஷித், புளுங்கெட், டாசன், பில்லிங்ஸ், ஜேம்ஸ் வினஸ், ரீஸ் டோப்லே.