Designed by Iniyas LTD
புத்தளத்தில் பெருமளவான வெடிபொருட்கள் வைத்திருந்தவர் கைது!
மறைத்து வைத்திருந்த பல இலட்சம் ரூபாய் பெறுமதியான ஜெலட்னைட் வெடி பொருள் உள்ளிட்ட மேலும் பல உபகரணங்களுடன் மூவரைக் கைது செய்துள்ளதாக புத்தளம் ஸ்ரீ பொலிஸ் நிலைய மோசடி ஒழிப்பு பிரிவினர் தெரிவித்துள்ளனர். ஆனமடு தோணிகல பிரதேசத்தில் நேற்று முன்தினம் வியாழக்கிழமை மேற்கொண்ட நடவடிக்கையின் போதே இந்த வெடிபொருட்கள் கைப்பற்றப்பட்டுள்ளன.
கைப்பற்றப்பட்ட வெடிபொருட்களை வைத்திருப்பதற்கான எந்த அனுமதிப்பத்திரங்களும் கைது செய்யப்பட்ட சந்தேக நபர்களிடம் இருக்கவில்லை எனவும், இவை சட்டவிரோதமான முறையிலேயே கைது செய்யப்பட்டவர்கள் வசிக்கும் இரு வீடுகளில் வைக்கப்பட்டிருந்ததாகவும், நீர்கொழும்பு மற்றும் கிரிவுல்ல ஆகிய பிரதேசங்களிலிருந்து முச்சக்கர வண்டியில் இவை இங்கு கொண்டு வரப்பட்டதாக கைது செய்யப்பட்ட சந்தேக நபர்கள் தெரிவித்துள்ளதாகவும் பொலிஸார் தெரிவித்தனர்.
640 ஜெலட்னைட் கூறுகள், 24 வெடிக்க வைக்கப்பயன்படும் நூல் ரோல்கள், 650 டெட்னேட்டர்கள் என்பனவே பொலிஸாரால் கைப்பற்றப்பட்டுள்ளன. மீனவர் போல வேடமிட்ட ஸ்ரீலங்கா கடற்படையின் புலனாய்வுப் பிரிவின் அதிகாரி ஒருவர் பல நாட்களாக இந்த வெடி பொருட்களைக் கொள்வனவு செய்வதற்கு முயற்சித்து வந்துள்ளதோடு நேற்று முன்தினம் இந்த வெடிபொருட்களைக் கொள்வனவு செய்வதற்கு முற்பட்ட போதே புத்தளம் பொலிஸ் நிலைய மோசடி ஒழிப்பு பிரிவினர் பலத்த சிரமத்தின் மத்தியில் சந்தேக நபர்களைக் கைது செய்துள்ளதுடன் வெடி பொருட்களையும் கைப்பற்றியுள்ளனர்.
கைது செய்யப்பட்ட மூவரும் ஆனமடு தோணிகல பிரதேசத்தைச் சேர்ந்தவர்கள் எனவும், இவர்களுள் 23 வயது இளைஞனுடன் அவ்விளைஞரின் தந்தையும் அடங்குவதாகவும் பொலிஸார் தெரிவித்தனர். கைது செய்யப்பட்ட சந்தேக நபர்களை கைப்பற்றப்பட்ட வெடி பொருட்களுடன் மேலதிக நடவடிக்கைகளுக்காக ஆனமடு பொலிஸ் நிலையத்தில் புத்தளம் மோசடி ஒழிப்பு பிரிவினர் ஒப்படைத்துள்ளதாக தெரிவிக்கப்படுகிறது.