பெல்ஜியத்தில் துருக்கியர்கள் கத்திக்குத்து! மூவர் படுகாயம்

பெல்ஜியம் தலைநகர் புரூசல்ஸில் துருக்கி நாட்டவர்களின் இரு குழுக்களுக்கு இடையே ஏற்பட்ட மோதலில் மூவருக்கு கத்திக் குத்து விழுந்துள்ளது.

துருக்கியில் அடுத்த மாதம் 16-ஆம் தேதி அந்நாட்டின் தற்போதைய அதிபர் எர்துவானுக்கு கூடுதல் அதிகாரம் அளிப்பது குறித்த வாக்கெடுப்பு நடைபெற உள்ளது. இந்த வாக்கெடுப்பில் உலகம் முழுவதும் உள்ள துருக்கியர்கள் கலந்து கொள்ள உள்ளனர்.

இந்த வாக்கெடுப்பில் எர்துவான் வெற்றி பெற்றால், அவர் வரும் 2029-ஆம் ஆண்டு வரை அதிபர் பதவியில் நீடிப்பார்.எனவே இந்த வாக்கெடுப்புக்கு துருக்கியின் குர்து இன மக்கள் தொடர்ந்து எதிர்ப்பு தெரிவித்து வருகின்றனர். இந்த இன மக்கள் அதிக அளவில் பெல்ஜியத்தில் வாழ்ந்து வருகின்றனர்.

எனவே எர்துவானுக்கு எதிர்ப்பு தெரிவித்து பெல்ஜியத்தில் உள்ள துருக்கி தூதரகம் முன்பு அவர்கள் தொடர் போராட்டங்களில் ஈடுபட்டு வருகின்றனர்.

இந்நிலையில் சில மணி நேரங்களுக்கு முன்னர் பெல்ஜியம் தலைநகர் புருசல்ஸில் உள்ள துருக்கி தூதரம் முன்னர் கூடியிருந்த குர்து இன மக்களுக்கும், துருக்கி அதிபர் எர்துவானின் ஆதரவாளர்களுக்கு இடையே கைகலப்பு ஏற்பட்டது. இந்த சம்பவத்தின் போது எர்துவானின் ஆதரவாளர் கத்தியால் தாக்கியதில், மூன்று குர்து இன மக்கள் மூவர் காயமடைந்தனர்.

காயமடைந்த அனைவரும் மருத்துவமனையில் சிகிச்சைக்காக அனுமதிக்கப்பட்டுள்ளனர். இவர்களில் ஒருவரின் நிலைமை கவலைக்கிடமாக உள்ளது.