பயிற்சியின் போது உயிரிழந்த தென்ஆபிரிக்க கிரிகட் வீரர்

தென் ஆப்பிரிக்க கிரிக்கட் வீரர் ஒருவர் பயிற்சியின் போது திடீர் என கீழே வீழ்ந்து உயிரிழந்த சம்பவம் அனைவர் மத்தியிலும் அதிர்ச்சியை ஏற்படுத்தியுள்ளது.

தென் ஆப்பிரிக்க முன்னாள் வீரர் பின்கோ நகம் கேப் டவுனில் கிரிக்கட் எகடமியொன்றை நடத்தி வருகிறார். அங்கு பயிற்சி மற்றும் உடற்தகுதி தேர்வுகள் நடத்தப்பட்டன. அப்போது இடைவேளையில் லுகான்யா டஸ்கி என்ற வீரர் திடீரென மயங்கி கீழே வீழ்ந்தார். அவரை உடனடியாக அருகில் இருந்த மருத்துவமனைக்கு கொண்டு சென்றும் அவர் பரிதாபமாக உயிரிழந்துள்ளார். அவருக்கு இதய கோளாறு இருந்ததாக கூறப்படுகிறது. கிரிக்கட் அகாடமியை நடத்தி வந்த பின்கோ நகம் கூறுகையில், டஸ்கி நலமாகவே இருந்தார், அவருக்கு எந்த பிரச்சனையும் இல்லை.

அவர் உடற்தகுதி தேர்வின் ஒரு பகுதியை முடித்து விட்டு, தனது சட்டையை கழற்றி சக வீரர்களுடன் பேசிக் கொண்டு இருந்தார். அப்போது திடீரென இருமிக் கொண்டே கீழே வீழ்ந்து விட்டார். நாங்கள் உடனடியாக அவரை மருத்துவமனைக்கு கொண்டு சென்றோம், இருப்பினும் தாமதம் ஆகிவிட்டது” என்று கூறியுள்ளார். டஸ்கி குடும்பத்தினருக்கு தனது அனுதாபங்களை தெரிவித்த தென் ஆப்பிரிக்க கிரிக்கட் வாரியத்தின் தலைமை நிர்வாகி ஹாரூன் லோர்கட், இது அதிர்ச்சி தரும் செய்தி எனவும் குறிப்பிட்டுள்ளார்.