அமெரிக்க தேர்தலில் ஹிலாரிக்கு வெற்றி வாய்ப்பு!

அமெரிக்க அதிபர் தேர்தல் தொடர்பாக வெளியிடப்பட்டுள்ள இறுதிக்கட்ட கருத்துக் கணிப்புகளில், ஹிலாரி கிளிண்டனுக்கே வெற்றி வாய்ப்பு அதிகம் எனக் கூறப்பட்டுள்ளது.

பெரும் எதிர்பார்ப்புக்கு இடையே அமெரிக்க அதிபர் பதவிக்கான தேர்தல் நடைபெற்று முடிந்துள்ளது. இதில், வெற்றி பெறப் போவது, ஜனநாயகக் கட்சி வேட்பாளர் ஹிலாரி கிளிண்டனா அல்லது குடியரசுக் கட்சி வேட்பாளர் டொனால்டு டிரம்பா என ஆரம்பம் முதலே உலக அளவில் எதிர்பார்ப்பு கிளம்பியது.

இதற்கேற்ப, பிரசாரத்தில் தொடங்கி வாக்குப் பதிவு நடைபெற்றது வரை டொனால்டு டிரம்ப் மற்றும் ஹிலாரி கிளிண்டன் இடையேயான வெற்றி வாய்ப்பு இழுபறியாகவே நீடிக்கிறது. ஆரம்பத்தில் வெளியான கருத்துக் கணிப்புகள் கூட, இதையே எதிரொலிப்பதாக அமைந்தன.

இந்நிலையில், தற்போது ராய்ட்டர்ஸ், வாஷிங்டன் போஸ்ட் உள்ளிட்ட அமெரிக்க செய்தி நிறுவனங்கள் அதிபர் தேர்தல் தொடர்பான இறுதிக்கட்ட கருத்துக் கணிப்பை வெளியிட்டுள்ளன. அதில், டிரம்பை பின்னுக்குத் தள்ளி ஹிலாரி கிளிண்டனே முன்னிலை பெற்றுள்ளார்.

இவர்கள் இருவருக்கும் இடையே உள்ள ஆதரவு வித்தியாசம் மிகவும் குறைவாகவே உள்ளது. இருந்தபோதிலும், ஹிலாரி கிளிண்டனின் வெற்றி உறுதியாகியுள்ளதாக, அந்நாட்டு ஊடகங்கள் குறிப்பிட்டுள்ளன.

அமெரிக்கா முழுவதுமே பல்வேறு பகுதிகளில், பொதுமக்கள் ஆர்வத்துடன் திரண்டுவந்து வாக்களித்தனர். அதிபர் பதவிக்கு முதல்முறையாக ஒரு பெண் போட்டியிடுகிறார் என்பதால், வாக்களிக்க வந்த பெண்களின் எண்ணிக்கை அதிகளவில் இருந்தது.

பல இடங்களில் மக்கள் அமைதியாக, நீண்ட வரிசையில் நின்று வாக்களித்துச் சென்றனர். அமெரிக்காவை நல்ல முறையில் வழிநடத்திச் செல்லும் தலைவருக்கே தங்களது வாக்கைச் செலுத்தியதாகவும் பொதுமக்கள் குறிப்பிட்டனர்.