ஐ எஸ் இற்கு நிதி சேகரித்தவர்களுக்கு கடுமையான சிறைத்தண்டனை!

சிங்கப்பூரில் ஐ.எஸ். இயக்கத்துக்கு நிதி திரட்டியதுடன், வங்காளதேச அரசை கவிழ்க்கவும் முயற்சித்ததாக வங்காளதேசத்தை சேர்ந்த சிலர் சிக்கினர். இது தொடர்பாக 6 பேர் மீது அங்குள்ள கோர்ட்டில் பயங்கரவாத (நிதி மறைப்பு) சட்டத்தின்கீழ் வழக்கு தொடரப்பட்டு விசாரணை நடத்தப்பட்டது. இந்த சட்டத்தின்கீழ் நடந்த முதல் வழக்கும் இதுதான்.

இதில் நிதி திரட்டிய கும்பலின் தலைவனான ரகுமான் மிசானுருக்கு 5 ஆண்டு சிறை தண்டனை விதிக்கப்பட்டது. அவரது கூட்டாளிகளில் சொஹேல் ஹாவ்லதருக்கு 2 ஆண்டு சிறை தண்டனை, மியா ரூபேலுக்கும், முகமது ஜப்பாத் கைசாருக்கும் தலா 2½ ஆண்டு கடுங்காவல் சிறை தண்டனை விதிக்கப்பட்டது.

ஜமான் தவுலத், மாமுன் லியாகத் அலி என்னும் 2 பேர் மீதான வழக்கு விசாரணை தொடர்கிறது.

வங்காளதேசத்தில் உள்ள அரசை கவிழ்த்து விட்டு, ஐ.எஸ். இயக்கத்தின் அரசை நிறுவுவதுதான் 6 பேரின் முக்கிய நோக்கமாக இருந்துள்ளதாக வழக்கு ஆவணங்களில் குறிப்பிடப்பட்டுள்ளது.