அரசாங்கம் தமிழ் தேசிய கூட்டமைப்புடன் நீண்ட தூரம் பயணத்தை மேற்கொள்வதற்கு வாய்ப்பில்லை- வாசுதேவ நாணயக்கார ..

தற்போதைய அரசாங்கம் தமிழ் தேசிய கூட்டமைப்புடன் நீண்ட தூரம் பயணத்தை மேற்கொள்வதற்கு வாய்ப்பில்லை என நாடாளுமன்ற உறுப்பினர் வாசுதேவ நாணயக்கார தெரிவித்துள்ளார்.

இந்நிலையில்  எதிர்கட்சி தலைவர் மஹிந்த ராஜபக்ஷவை பிரதமராக்கும் பிரேரணையையொன்று எந்நேரத்திலும் நாடாளுமன்றத்தில் சமர்ப்பிக்கும் நிலைமை காணப்படுவதாகவும் அவர் நம்பிக்கை வெளியிட்டுள்ளார்.

அரசாங்கத்தின் தற்போதைய செயற்பாடுகள் தொடர்பாக ஊடகங்களுக்கு கருத்து தெரிவிக்கும்போதே அவர் இதனை குறிப்பிட்டுள்ளார்.

மேலும்  கூட்டமைப்புடன் இணைந்து அரசாங்கம் பயணிப்பதை ஐக்கிய தேசிய கட்சியை சேர்ந்த சிலர் விரும்பவில்லை என்றும்,

இதனால் ஸ்ரீ லங்கா சுதந்திர கட்சியை சேர்ந்த உறுப்பினர்களை அரசாங்கத்துடன் இணைக்கும் முயற்சிகள் இடம்பெற்று வருவதாகவும் அவர் கூறியுள்ளார்.

அதோடு  ஐக்கிய தேசிய கட்சி மற்றும் கூட்டமைப்புக்கு   மஹிந்த மீண்டும் பிரதமராவாரென்ற அச்சம் நிலவுகின்றதாகவும்,

இதன் காரணமாகவே  மஹிந்தவை சார்ந்த உறுப்பினர்களின் நாடாாளுமன்ற பதவியை பறிப்பதற்கான செயற்பாடுகளை இரு கட்சிகளும் மேற்கொண்டு வருகின்றதாகவும் அவர் குறிப்பிட்டுள்ளார்.

இந்த நிலையில்  மஹிந்தவை பிரதமராக்குவது தொடர்பில் ஏனைய சில கட்சிகளுடன் தாம் பேச்சுவார்த்தையில் ஈடுபட்டு வருகின்றதாகவும் அவர் கூறியுள்ளார்.

மேலும்  ஐ.தே.க.வுக்கு எதிராக பிரச்சினைகள் மேலோங்கும்போது நாம் மஹிந்தவை பிரதமராக்கும் பிரேரணையை முன்வைப்போம்  எனவும்  வாசுதேவ நாணயக்கார இதன்போது தெரிவித்துள்ளமை குறிப்பிடத்தக்கது.