Designed by Iniyas LTD
யாழ் போதனாமருத்துவமனைக்கு செல்லும் பார்வையாளர்கள் அவலம்.

யாழ்.போதனா மருத்துவமனைக்கு நோயாளிகளைப் பார்வையிட வரும் பார்வையாளர்கள் பார்வையிட அனுமதிக்கும் நேரம் வரை வீதிகளில் காத்திருந்து பல்வேறு அசெளகரியங்களையும் ஆபத்துக்களையும் எதிர்நோக்குவதாக விசனம் தெரிவிக்கின்றனர்.
மருத்துவமனையின் முன்பக்க வாயில் ஊடாகச் செல்லும் பார்வையாளர்கள் மருத்துவமனை வீதியில் நண்பகல் 12 மணி வரை தகிக்கும் வெய்யிலில் ஒதுங்கி நிற்க இடமின்றி வீதியை ஆக்கிரமித்து காத்திருக்க வேண்டியுள்ளது தாகவும் மக்கள் கவலை வெளியிட்டுள்ளனர்.
போக்குவரத்து மிகுந்த மருத்துவமனை வீதியில் மக்கள் குழுமி நிற்பதனாலும் அவர்கள் பயணித்து வந்த மோட்டார் உந்துருளி மற்றும் ஊர்திகளும் அவ்விடத்தில் நிறுத்தி வைக்கப்படுவதாலும் அந்த வீதியால் பயணிக்கும் ஊர்தி ஓட்டுனர்களும் பொது மக்களும் பல அசெளகரியங்களுக்கு ஆளாக நேரிடுவதோடு விபத்துக்களையும் எதிர்நோக்க வேண்டியுள்ளது என்று சுட்டிக்காட்டப்படுகிறது.
தற்போது மருத்துவமனையின் புதிய கட்டடத் தொகுதிக்கு கிழக்குப் புறமாகவுள்ள சிறிய வாயிலூடாகவே பார்வையாளர்கள் உட்செல்ல அனுமதிக்கப்படுகிறார்கள். தற்போதும் அங்கு “பாஸ்’ நடை முறை இருப்பதால் அவ்விடத்தில் வைத்து பாதுகாப்பு ஊழியர்கள் “பாஸ்’ அனுமதிச் சிட்டையை பரிசோதித்த பின்னரே உள்ளே அனுமதிக்ன்றனர்.
இவ்வாறான நடைமுறைகளினால் நீண்ட நேரம் காலை மதியம் மாலை என வெய்யிலையும் பொருட்படுத்தாது ஊர்திகளால் ஏற்படும் பாதிப்புகளையும் சகித்துக் கொண்டு காத்திருக்க வேண்டியுள்ளதாக மக்கள் கவலை தெரிவிக்கின்றனர்.
இந்த அசெளகரியங்களை நீக்குவதற்கு மருத்துவமனையின் உட்பகுதி முற்றத்தின் ஒரு பகுதியில் தடுப்புவேலி ஏற்படுத்தி அதற்கு முன்பாக பார்வையாளர்கள் கூடி நிற்க அனுமதிக்கலாம். அனுமதிக்கப்படும் உரிய நேரம் வந்ததும் உட் செல்லும் நடை முறையைப் பின்பற்றுவது சுலபமாக இருக்கும் எனப் பொது மக்கள் மேலும் தங்கள் கருத்தைதெரிவிக்கின்றனர்.
இதே குறைபாடுகளோடு மருத்துவமனையின் பின் பகுதி நுழைவாயிலான விக்ரோறியா வீதிப் பகுதியும் காணப்படுவது குறிப்பிடத்தக்கது.